Rückblick

Fasnachtsrückblick 2015

Leider isch d'Fasnacht 2015 scho wieder Gschicht. Viel z'schnäll sin die drei - für uns sins fünf - schönschte Dääg vorbi gange. Was blibt isch d'Erinnerig an die tolli Zyt. Mit dä Föteli uf unserer Homepage schwelge mir no ä chli in dr Vergangeheit und lö die ein oder anderi Erinnerig ufblühe.

Am Fritigobe hän mir in unserem Cliquekäller – quasi als Hauptprob - so richtig gschränzt. D’Vorfreud uf d’Fasnacht isch spürbar bzw. unüberhörbar gsi. D’Chummerbuebe und -meitli sind parat für d’Fasnacht 2015 !!!

Aschliessend sin mir zum Momo in „Leue“ s‘Zwingä – das isch unser Stammlokal - disloziert. Dört hän mir uns bi feschter und flüssiger Nahrig bis spoot in d’Nacht uf d’Fasnacht 2015 igstimmt. Unsere „i cha nüt drfür Stefi“ het denn au no e Film vo unserem Huus-Regisseur Andi Häner über unsere Fasnachtsobe 2014 zeigt und jetzt ischs „Kribbele“ endgültig bi alle do gsi.

 

D'Wätterprognose für dr Samschtignomidaag het nüd guets verheisse. Aber zum guete Glück hän sich d’Prophete dosche. Dr Petrus isch eimol meh uf unserer Site gsi und so het dä chlini Umzug s’Zwingä bi schönem und warmem Wätter chönne stattfinde. Nachher isch, wie allewyl, no Feschtbetrieb in dr Aula gsi. Dangg em schöne Wätter hän sich d’Fasnächtler und au Zuschauer vorwiegend vorusse könne ufhalte. D’Gugge hän dinne und dusse gschränzt wies Bisiwätter und d’Lüt sin begeischteret gsi.

 

 Unser Highlight vo dr Fasnacht het denn z'Obe im „Leue“ stattgfunde. De traditionelli Alass „Beizefasnacht vo und mit de Chummerbuebe“ isch über d’Landesgränze us bekannt und so ischs denn nit verwunderlich, dass d'Beiz bis uf dr letschti Platz gfüllt gsi….jä sogar us allne Nöht platzt isch. Drum hän einigi Gäscht – drunter au unseri Fründe vo dr Guggemusig Schwitzchäschte - leider kei Platz me gfunde. Unseri zwei Aktöre, dr Stefi (los lo si) und dr Rolf (alias Valentin) hän mit ihre Sketches und Rahmestüggli immer  wieder z‘begeischtere gwüsst. Zwüschedure hän mir Chummerbuebe als Gugge für musikalischi Unterhaltig gsorgt.

D'Lüt händ sich köstlich amüsiert. Besser cha ä Beizefasnacht nit gläbt wärde. Bösi Zunge bhaupte, dass e nächscht Johr e Vorverkauf wird gä…..

 

Am Sunntignomidaag - au wieder bi idealem Wätter - isch denn dr Umzug z'Laufe ufem Programm gstande. Ä huffe Lüt hän däm Alass bigwohnt und bis spot in d'Nacht ine isch im Städtli gschränzt und gfeschtet worde. Natürlig sind au d’Chummerbuebe bis früeh am Morge unterwägs gsi. Zwar nümm spiel-fähig – aber nur, will d’Inschtrument versorgt gsi sin- drfür aber immer no dringgfescht.

Am Mändig isch für d'Chummerbuebe und -meitli freie resp. individuelle Usgang. Scho fascht traditionell  isch aber d’Chummerbuebe-Jury am Chinderumzug. In Uniforme vo dr Poschtmusig Bärn hän sich einigi Chummerbuebe wieder vorem Dixi platziert und jedere Chinderclique mit luschtige Bewärtige ihri Annerkennig kund do. Jewyl s’chlinste Chind vo jedere Clique het ä – äxtra gfertigti - Uszeichnig becho. Insgesamt hän 80 Blaggedde so ihre glücklige Abnähmer gfunde. De Alass isch mittlerwile kuum me wegzdängge will er bi de Chinder und de Erwachsene glichermasse beliebt isch. D’Chummerbuebe-Jury wird jewils mit Däfeli, Schöggeli etc. überhüft und d’Chinder wänn sogar amme alli e Blaggedde vo de Chummerbuebe. Es isch immer wieder schön die vor Freud lüchtende Chinderauge z’gseh. Drum freue mir uns jetzt scho d’Chummerbuebe-Jury 2016 wieder durezfüehre.

 

Zobe het denn d’Wiberfasnacht mit em Guggekonzärt stattgfunde. S’Städtli und d’Beize sind wieder prope voll gsi … und nit nur die ;-) Au unseri Cliquemitglieder sin einzeln oder e paar zämme unterwegs gsi. Leider gits do drzue keini Anekdote z’brichte ... ämmel keini ohni Gwähr.

Am Zischtig het denn dr zweiti Umzug stattgfunde. S’Wätter isch nümm ganz so schön gsi. drum – und will wohrschinlig no einigi hän müesse go schaffe - hets au weniger Bsuecher als am Sunntig gha. Nichtsdestotrotz isches wieder ä schöne Umzug gsi. Nach em Umzug hän mir im Städtli ä chli gschränzt, bevor mir denn im Rothuusstübli no fein sin go z’nachtässe. Am nüni isch denn leider mitem Spiele definitiv Schluss gsi. Mit em Lied „good by my love good by“ hän mir d’Fasnacht 2015 musikalisch usklinge lo. Wehmüetig hän mir uns vo dr Frau Fasnacht verabschiedet-, aber glichzitig au scho d‘Vorfreud uf d’Fasnacht 2016 in unser Bluet lo ifliesse !!